ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԱՅԻՆ ԿԱՌԱՎԱՐՄԱՆ և ԶԱՐԳԱՑՄԱՆ ՆԱԽԱՐԱՐՈՒԹՅՈՒՆ </br>ՄԻԳՐԱՑԻՈՆ ԾԱՌԱՅՈՒԹՅՈՒՆ

«Գերմանական միջազգային համագործակցություն»-ը (GIZ) մշակում է տնտեսական ինտեգրմանն ուղղված նոր ծրագիր

2018-10-08

ՀՀ ՏԿԶՆ միգրացիոն ծառայություն էին հյուրընկալվել «Գերմանական միջազգային համագործակցություն» ընկերության (GIZ) ներկայացուցիչները՝ «Հարավային Կովկասում տեղահանված և տեղական խոցելի բնակչության տնտեսական և սոցիալական մասնակցություն» (Economic ans Social Participation of Vulnerable Displaced and Local Populations in the South Caucasus (EPIC)) ծրագրի ղեկավար Ֆրեդերիկե Ռոչովանսկին և ընկերության ներկայացուցիչ Կարինե Սինոյանը՝ ներկայացնելու մշակման փուլում գտնվող մի ծրագիր, որը նախատեսում է տնտեսական և սոցիալական ինտեգրում իրականացնել շահառուների համար։

«Մենք թիրախավորել ենք սիրիահայերին, և նախատեսում ենք ծրագրի շահառու դիտարկել ոչ միայն փախստականներին, այլ նաև խոցելի վիճակում գտնվող տեղացիներին ևս»,-նշեց ծրագրի ղեկավարը՝ մասնավորեցնելով, որ ծրագիրը բաղկացած է չորս բաղադրիչներից և ներառում է կարողությունների ու հմտությունների զարգացում պետական կառույցների համար, տնտեսական մրցունակության բարձրացման նպատակով վերապատրաստումներ, ձեռնարկատիրությամբ զբաղվելու համար փոքր դրամաշնորհների տրամադրում, ինչպես նաև սոցիալական համայքների զարգացման ուղղված միջոցառումներ։

«Մենք իսկապես բարձր ենք գնահատում նմանօրինակ ծրագրերը, քանի որ Ծառայության կողմից իրականացվող ինտեգրման ծրագիրը ռեսուրսների սղության պատճառով չունի տնտեսական բաղադրիչ անկախ այն հանգամանքից, որ մենք քաջ գիտակցում ենք դրա կարևորությունը»,-նշեց ՄԾ պետի տեղակալ Իրինա Դավթյանը՝ առաջարկելով հյուրերին ընդգրկվել աշխատանքային խմբում, որն այս պահին ձևավորման փուլում է և առաջիկայում նպատակաուղղվելու է ինտեգրման մեկ միասնական պետական հայեցակարգի մշակմանը։

Ծրագրում ներգրավված են Հարավային Կովկասի 3 պետությունները, և այն իրականացվելու է 2018 թվականի հոկտեմբերի 1-ից մինչև 2021 թվականի հոկտեմբերի 1-ը ընկած ժամանակահատվածում:  

Հանդիպմանը քննարկվեցին նաև ծրագրի շահառուներ հանդիսանալու չափորոշիչների հարցը, ինչպես նաև Ծառայության կողմից առաջարկվեց դիտարկել Անդրբեջանից բռնագաղթած փախստականներին ևս ծրագրի շահառու դառնալու հնարավորությունը: