ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԱՅԻՆ ԿԱՌԱՎԱՐՄԱՆ և ԶԱՐԳԱՑՄԱՆ ՆԱԽԱՐԱՐՈՒԹՅՈՒՆ </br>ՄԻԳՐԱՑԻՈՆ ԾԱՌԱՅՈՒԹՅՈՒՆ

Մարդկանց առևտրի դեմ պայքարի թեմայով սիմուլյացիոն վարժություն Աստանայում

2018-10-02

        «Մարդկանց առևտրի  դեմ  պայքարը  միգրացիոն  երթուղիներում» թեմայով միջազգային քառօրյա  սիմուլյացիոն վարժությանը մասնակցեցին ՏԿԶՆ  միգրացիոն ծառայության պետի տեղակալ  Իրինա  Դավթյանը  և  Առողջապահության  նախարարության առողջապահական  տեսչական մարմնի  աշխատակից   Աշոտ Հարությունյանը։

         Սիմուլյացիոն վարժությանը  մասնակցում  էին  ԵԱՀԿ  անդամ  14  պետությունների  ինչպես  պետական  մարմինների,  այնպես  էլ  հասարակական  կազմակերպությունների  105  ներկայացուցիչներ։

«Միջոցառման  հիմնական  նպատակն  էր  մասնակիցներին  հնարավորություն  տալ   պասիվ լսողից, ինչպես դա  տեղի է ունենում  ստանդարտ  սեմինարների  ընթացքում,  վերածվել   ակտիվ  մասնակիցների,    այլ  կերպ  ասած    ամբողջովին ներքաշվել  իրադարձությունների  մեջ,  որոշումներ  կայացնել,  պատասխանատվություն  կրել  այդ  որոշումների  հետևանքների  համար  և  այդ  ամբողջ  ընթացքում   համագործակցել միմյանց  հետ».-նշեց Ի. Դավթյանը՝ ավելացնելով, որ միջոցառման  կարգախոսն  էր՝   «սովորիր կատարելով»։

Մասնակիցները  բաժանված  էին    առանձին  խմբերի,  ըստ   մարդկանց առևտրի  դեմ պայքարում  ներգրավված  պետական մարմինների՝  ոստիկանություն, սոցիալական  հարցերի  նախարարություն,  միգրացիոն ծառայություն,  դատախազություն,  աշխատանքային  տեսչություն   և  հասարակական հատվածի՝  հասարակական կազմակերպություններ, կացարան, իրավաբաններ։  Վարժությանը  մասնակցում  էին  հրավիված  դերասաններ,  որոնց  միջոցով  կազմակերպիչները խաղարկում  էին  տարբեր    իրավիճակներ,  որոնք  հնարավորինս  նմանեցված  էին  իրական  կյանքին։

        Վարժության  ավարտին  մասնակիցներին  տրվեցին    մասնակցության  վերաբերյալ   հավաստագրեր։

Միջոցառումը կազմակերպվել  էր Ղազախստանի  մայրաքաղաք Աստանայում  ԵԱՀԿ մարդկանց առևտրի  դեմ պայքարի հատուկ  ներկայացուցչի  և համակարգողի բյուրոյի  կողմից՝  Ղազախստանի Հանրապետության  գերագույն դատախազությանը  կից   իրավապահ  մարմինների  ակադեմիայի  հետ  համագործակցությամբ։