ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԱՅԻՆ ԿԱՌԱՎԱՐՄԱՆ և ԶԱՐԳԱՑՄԱՆ ՆԱԽԱՐԱՐՈՒԹՅՈՒՆ </br>ՄԻԳՐԱՑԻՈՆ ԾԱՌԱՅՈՒԹՅՈՒՆ

Ազգային անվտանգության խնդիրները՝ փախստականների պաշտպանության ոլորտում

2018-09-25

    Այսօր Թբիլիսիում մեկնարկեց «Անդրադառնալով ազգային անվտանգության խնդիրներին առանց խաթարելու փախստականների պաշտպանությունը» խորագրով երկօրյա տարածաշրջանային կլոր-սեղանը՝ կազմակերպված ՄԱԿ ՓԳՀ-ի և Եվրոպայի Խորհրդի հետ համատեղ: Այն հնարավորություն կընձեռնի Հայաստանից, Ադրբեջանից Բելառուսից, Վրաստանից, Մոլդովայից և Ուկրաինայից Ազգային անվտանգության ծառայությունների աշխատակիցներին, ապաստանի հարցերին առնչվող մարմիններին և դատավորներին քննարկել ներկայիս մարտահրավերները և լավագույն փորձը ազգային անվտանգության պաշտպանության ոլորտում՝ առանց խաթարելու փախստականների պաշտպանությունը և մարդու իրավունքների չափանիշները՝ Մարդու իրավունքների եվրոպական կոնվենցիային համաձայն։ ՄԱԿ ՓԳՀ Հարավ Կովկասյան տարածաշրջանային ներկայացուցիչ Յոհաննես վան դեր Կլաուն ողջունելով միջոցառման մասնակիցներին նշեց, որ թեման շատ կարևոր է՝ նկատի ունենալով պետությունների առջև ծառացած մարտահրավերը՝ մի կողմից ազգային անվտանգության նկատառումները, իսկ մյուս կողմից էլ՝ փախստականների պաշտպանության միջազգային պարտավորությունների կատարման նպատակով ընդունվող որոշումներ: «Երբեմն ընդունվող որոշումները իրարամերժ են, ինչից էլ տուժում են մարդիկ, այդ պատճառով կարևոր է բոլոր կողմերի համագործակցությունը՝ ազգային անվտանգության, դատական համակարգի և ապաստանի տրամադրման մարմինների»,-ասաց նա: Վրաստանում ԵԽ գրասենյակի ղեկավար՝ Քրիստիան Ուրսը իր ողջույնի խոսքում նշեց, որ անհրաժեշտ է պետությունների կողմից պահպանել բալանսը՝ ազգային անվտանգության և փախստականների պաշտանության առումով, հաշվի առնելով մարդու իրավունքները: Միջոցառմանը բացման խոսքով հանդես եկավ նաև Վրաստանի ներքին գործերի նախարարի տեղակալ Նինո Ջավախիդզեն, ով նույնպես կարևորելով աշխատաժողովի թեման՝ նշեց, որ ներկայումս Վրաստանը առճակատվում է միգրացիոն աճող հոսքերի, և երբեմն իրենք էլ բախվում են ագզային անվտանգության և փախստականների պաշտապանության բալանսավորված որոշման ընդունմանը: Միջոցառմանը մասնակցում է ՀՀ ՏԿԶՆ Միգրացիոն ծառայության պետ Արմեն Ղազարյանը: